Pesë persona janë vrarë dhe dy fëmijë janë plagosur pasi një burrë i veshur me jelek antiplumb hapi zjarr në qytetin amerikan të Filadelfias, raporton BBC.

Sulmuesi i dyshuar, një burrë 40-vjeçar i cili tani është në paraburgim, mbante një pushkë të stilit AR-15, një pistoletë, një skaner policie dhe municione.

Ai nuk ka asnjë lidhje të njohur me viktimat dhe, pa ndonjë motiv të qartë, të shtënat dukej të ishin të rastësishme.

“Kur oficerët u përgjigjën, ata identifikuan dhe gjetën disa viktima me armë zjarri,” tha komisionerja e policisë Danielle Outlaw. “Ndërsa po merrnin viktimat dhe i përgatisnin për transport në spital, ata dëgjuan gjithashtu të shtëna të shumta armësh”.

Më pas oficerët e ndoqën të dyshuarin në këmbë, ndërsa të shtënat vazhduan, duke dëmtuar makinat e parkuara dhe duke mbushur rrugët me gëzhoja.

Rreth orës 20:40 me orën lokale, policia e mbylli burrin në një rrugicë. Ai u dorëzua dhe u arrestua pa incidente të mëtejshme.