Janë 20 kandidaturat e depozituara në Kuvendin e Shqipërisë për pozicionin e Avokatit të Popullit. Në listën që i është dërguar Komisionit të Ligjeve, bie në sy emri i Bledar Dervishit, i cili ka udhëhequr betejat ligjore të Presidentit Ilir Meta.

Ish-drejtori i lartë i Policisë, Ahmet Premçi, që vetëm pak muaj më parë u votua me konsensus si komisioner pranë të njëjtit institucion, kërkon të ngjisë shkallët në drejtimin e tij.

Dy juristë, anëtarë të Komisionit të Ankimimeve dhe Sanksioneve në KQZ, Ilirjan Rusmali dhe Ledio Braho, duket se kërkojnë të ndryshojnë vend pune, duke aplikuar për postin e Avokatit të Popullit. Ata duhet të sfidojnë drejtuesen aktuale të institucionit, Erinda Ballancën, e cila kërkon gjithashtu konfirmimin për një mandat të dytë.

Komisioni për Çështjet Ligjore do të bëjë verifikimin e kandidatëve dhe do të zhvillojë seanca dëgjimore me secilin prej tyre. Sipas traditës parlamentare, ky pozicion ka qenë gjithmonë për opozitën.