Për shkak të “humbjeve katastrofike” në Ukrainë, Kremlini po ndryshon tonin e propagandës së tij, ka thënë inteligjenca ukrainase.

Sipas Al Jazeera, për të përgatitur rusët e zakonshëm për një disfatë të mundshme, media e kontrolluar nga Kremlini filloi ta paraqesë luftën si konfrontim të Moskës me Bashkimin Evropian dhe anëtarët e NATO-s, tha në Facebook, Shefi i Departamentit të Inteligjencës së Ministrisë së Mbrojtjes të Ukrainës.

“Kjo do të zvogëlojë turpin e humbjes ndaj një kundërshtari më të fuqishëm”, citohet të ketë thënë ai.

Ndryshe, në fjalimin e tij të 9 majit në Sheshin e Kuq të Moskës, Putin tha se Ukraina mori “dërgesa të rregullta të armëve moderne” nga vendet anëtare të NATO-s.

Ndërkohë, po sipas mediumit në fjalë, humbjet e Moskës arritën në 26,000 ushtarë, duke përfshirë rreth 350 në 24 orët e fundit, tha ushtria e Ukrainës.

Që nga fillimi i agresionit më 24 shkurt, forcat ruse kanë humbur gjithashtu 1,170 tanke, 2,808 automjete të blinduara, 199 avionë dhe 158 helikopterë, tha Shtabi i Përgjithshëm i Forcave të Armatosura në Facebook të martën.