Lëvizja Vetëvendosje është duke biseduar me Partinë Demokratike të Kosovës, për të arritur një marrëveshje për bashkëqeverisje në Gjilan.

Kushti i PDK-së për të hyrë në koalicion me partinë fituese ishte pesë drejtori dhe posti i nënkryetarit ose ai i kryesuesit të Kuvendit Komunal të kësaj komune.

Por, këtë nuk e ka pranuar Vetëvendosja e cila i ka ofruar PDK-së tri drejtori.

Këtë e ka konfirmuar ish-kandidatja e PDK-së për kryetare të Gjilanit, Leonora Morina-Bunjaku, e cila tregoi poashtu se edhe ata tani e kanë ndryshuar ‘pazarin’.

“Ata na kanë ofruar tri drejtori. Ne fillimisht kemi kërkuar pesë drejtori edhe njërin nga postet ose atë të nënkryetarit ose të kryesuesit. Ndërkohë ne kemi lëvizur nga pesë në katër drejtori dhe postin e kryesuesit. Tani jemi në pritje të finalizimit të marrëveshjes për bashkëqeverisje”.

Sot nuk u arrit të zgjidhet kryesuesi i Kuvendit Komunal të Gjilanit, pasi nuk pati ujdi mes Vetëvendosjes me 10 asamblistë dhe partive opozitare.

Seanca e radhës e Kuvendit Komunal në Gjilan është caktuar më 7 janar.

VIDEO