Kompania e Deminimit e FSK-së do jetë pjesë e ushtrimit ndërkombëtar “KFOR 30”, që ka filluar sot në bazën ushtarake amerikane në Gjermani.

Në njoftimin e FSK-së, thuhet se në kuadër të bashkëpunimit bilateral dhe ftesës nga Shtetet e Bashkuara të Amerikës, Forca e Sigurisë së Kosovës me një kontingjent nga Kompania e Deminimit të Gardës Kombëtare, do të jetë pjesë në Ushtrimin Ndërkombëtar “KFOR 30”në Republikën Federale të Gjermanisë në bazën ushtarake Amerikane Hohenfels nga data 09 shkurt deri më 28 shkurt 2022.

“Ushtrimi “KFOR 30” përgatit dhe trajnon trupat për mision në Kosovë, ky ushtrim është vlerësues për trupat para zbarkimit për mision, përkatësisht me fokus kryesor situatën aktuale në territorin e Kosovës”, thuhet në njoftim.

Me tej thuhet se Forca e Sigurisë së Kosovës do të jetë pjesë e këtij ushtrimi me oficer e nënoficerë, me qëllim të ndëveprueshmërisë me partnerët duke bashkëvepruar në një ambient shumëkombësh, për të krijuar ambient të sigurt në Kosovë.