Ka përfunduar me sukses Kampionati individual i pingpongut për të rritur mbajtur me 22 dhe 23 mars.

Ditën e parë janë zhvilluar garat e çifteve deri në fazën finale dhe garat individuale në grupe.

Ditën e dytë u zhvilluan finalet për çifte të meshkujve, çifte të femrave dhe për çifte të përziera.

Fatih Karabaxhaku është fitues i tre titujve të Kampionit në tri kategori të ndryshme: individuale, çifte për meshkuj dhe çifte të përziera. Në çifte për meshkuj ka triumfuar bashkë me kolegun e tij të klubit Blend Hajdari, kurse me Taibe Rulin në kategorinë e çifteve të përziera.

Kategoria individuale solli shumë emocione dhe ndeshje të forta.

Fatih Karabaxhaku, pasi e mundi Dardan Imamin në gjysmëfinale, në duelin final arriti ta mposhtë edhe  Kreshnik Mahmutin, me 3:0 në seta, duke arritur ta mbrojë titullin e fituar vitin e kaluar.

Te femrat, Leoresa Imeri, së pari e mundi Shega Hashanin, në gjysmëfinale e pastaj e fitoi edhe finalen ndaj Lenë Osmanit.

Në garat e çifteve të përziera kampionët e këtij viti janë Fatih Karabaxhaku dhe Taibe Ruli, të cilët në finale e mundën çiftin Blend Hajdari/Shega Hashani me rezultatin 3:0.

Fatih Karabaxhaku dhe Blend Hajdari janë kampionë të rinj për çifte të meshkujve, pasi në finale me rezultatin 3:2, e mundën çiftin Murat Kurtulush/Rrahman Ademaj.

 Vlen të përmenden çiftet që zunë dy vendet e treta, pasi përbërja e tyre është për tu mbajtur në mend, baba e djal. Besart e Enes Domaniku, si dhe Yll e Adriatik Maloku, një dukuri e rrallë dhe e bukur.

 Shega Hashani dhe Alma Mehmeti janë kampione të reja për kategorinë çifte të femrave, pasi në finale ishin më të mira (3:0) se Leoresa Imeri dhe Taibe Ruli.

I gjithë aktiviteti dy ditor kaloi në një atmosferë të mirë sportive i përcjellë me një organizim shumë të mirë.

Kampionët sipas kategorive u shpërblyen me mirënjohje, medalje e Kupa, kurse vendet e dyta dhe të treta me medalje e mirënjohje. Shpërblimet u ndanë nga Kryetari i FPPK-së Jeton Oruqi dhe anëtari i Bordit, Besim Hajdari.

Renditja finale:

Meshkuj-Individuale:

1. Fatih Karabaxhaku

2. Kreshnik Mahmuti

3. Dardan Imami

3. Milot Makolli

Femra -Individuale

1. Leoresa Imeri

2. Lenë Osmani

3. Shega Hashani

4. Taibe Ruli

Çifte – meshkuj

1. Fatih Karabaxhaku/Blend Hajdari

2. Rrahman Ademaj/Murat Kurtulush

3. Besart Domaniku/Enes Domaniku

3. Adriatik Maloku/Yll Maloku

Çifte – femra

1. Shega Hashani/Alma Mehmeti

2. Leoresa Imeri/Taibe Ruli

3. Edolinda Alimehaj/Anesa Domaniku

3. Erjona Gacaferri/Tuana Gacaferri

Çifte të përziera

1. Fatih Karabaxhaku/Taibe Ruli

2. Blend Hajdari/Shega Hashani

3. Ibrahim Maloku/Leoresa Imeri

3. Enes Domaniku/Anesa Domaniku /Kosova.info/