Zyra e Kryeministrit Kurti ka lëshuar komunikatën e saj zyrtare për takimin që i pari i Qeverisë ka mbajtur me veteranët e UÇK-së, përfaqësuesit e familjarëve të dëshmorëve si dhe me kryetarin e shoqatës së invalidëve.

Në njoftimin e zyrës së Kurtit u tha se në takim u ritheksua “përkushtimi i Qeverisë për thellimin e bashkëpunimit me organizatën e veteranëve të luftës”.

Sipas Qeverisë, në takim u diskutua për çështjen e pastrimit të listave dhe mundësinë e bashkëpunimit në këtë aspekt.

“Në këtë takim të përbashkët të pranishëm ishin edhe Ministri i Financave, Punës dhe Transfereve, Hekuran Murati, këshilltari i Kryeministrit për Çështje të Kategorive të Dala nga Lufta e Ushtrisë Çlirimtare të Kosovës, Aziz Bici dhe Kryetari i Komisionit Parlamentar për Buxhet, Punë dhe Transfere, Armend Muja”, thuhet në komunikatë.

Njoftimi i plotë:

Me ftesë të Kryeministrit të Republikës së Kosovës, Albin Kurti, u mbajt takimi me përfaqësuesit e organizatave të veteranëve të luftës, Faton Klinakun, ushtrues detyre i kryetarit të Organizatës së  Veteranëve të Ushtrisë Çlirimtare të Kosovës, Xhavit Jashari, kryetar i Shoqatës së Familjarëve të Dëshmorëve të UÇK-së, Fadil Shurdhaj, kryetar i Shoqatës së Invalidëve të Luftës së UÇK-së  dhe kryetarët e disa degëve të organizatës së veteranëve të luftës.

U ritheksua përkushtimi i Qeverisë së Republikës së Kosovës për thellimin e bashkëpunimit me Organizatën e Veteranëve të Luftës së Ushtrisë Çlirimtare të Kosovës, me qëllim të përmirësimit të mirëqenies së veteranëve të UÇK-së.

 U bisedua edhe për çështjen e pastrimit të listave dhe mundësitë e bashkëpunimit në këtë aspekt, si dhe tema të tjera të rëndësishme lidhur me statusin dhe gjendjen e veteranëve të luftës çlirimtare të Ushtrisë Çlirimtare të Kosovës.

Në këtë takim të përbashkët të pranishëm ishin edhe Ministri i Financave, Punës dhe Transfereve, Hekuran Murati, këshilltari i Kryeministrit për Çështje të Kategorive të Dala nga Lufta e Ushtrisë Çlirimtare të Kosovës, Aziz Bici dhe Kryetari i Komisionit Parlamentar për Buxhet, Punë dhe Transfere, Armend Muja.