Arsenal ka zyrtarizuar transferimin e mesfushorit spanjoll Martin Zubimendi nga Real Sociedad, për një shumë prej pesëdhjetë e pesë milionë funta.

Pas shumë muajsh spekulimesh, londinezët thuhet se kanë vendosur të paguajnë më shumë se klauzola e lirimit, për ta realizuar marrëveshjen me pagesa në këste.

Ky transferim vjen në kohën kur dy mesfushorët me përvojë, Thomas Partey dhe Jorginho, janë larguar nga klubi pas përfundimit të kontratave të tyre. Afrimi i Zubimendi shihet si përforcim i rëndësishëm për skuadrën e Mikel Arteta, e cila synon ta ngushtojë hendekun me kampionin e Premier League, Liverpool.

Në paraqitjen e tij të parë si lojtar i Arsenalit, Zubimendi, ka thënë se ky ishte një moment i madh për karrierën e tij. “Kjo ishte lëvizja që e kam dëshiruar. Që në momentin e parë kur shkel në këtë klub, e ndien sa i madh është. Arsenal ka një stil loje që përputhet me timin dhe mendoj se më e mira është ende përpara”, është shprehur ai.

Zubimendi është njëzet e gjashtë vjeç dhe ka zhvilluar 236 ndeshje me Real Sociedad. Ai ishte pjesë e skuadrës që fitoi Copa del Rey në vitin 2020, duke i dhënë fund një periudhe tridhjetë e katërvjeçare pa trofe për klubin.

Ai ishte gjithashtu pjesë e Spanjës që fitoi Kampionatin Evropian 2024 dhe Nations League në vitin 2023.

Arsenal e nis përgatitjen për sezonin e ri më 23 korrik, me një ndeshje miqësore ndaj Milan.