Kapiteni i Zvicrës, Granit Xhaka, ka deklaruar se kombëtarja helvetike është e gatshme për të zhvilluar Kupën e Botës më të suksesshme në histori.

Zvicra do të përballet me Katarin të shtunën, ndërsa Xhaka ka theksuar se skuadra është më e motivuar se kurrë për ta nisur turneun me fitore.

“Në futboll flasim gjithmonë për taktika, por duhet edhe ta shijosh momentin. Kur hyn në fushë duhet të ndihesh i lirë. Ne duam të japim maksimumin për Zvicrën dhe për familjet tona. Nesër do ta bëjmë hapin e parë të madh”, ka thënë Xhaka në konferencën për media.

Mesfushori tridhjetë e tre vjeçar, i cili po merr pjesë në Botërorin e katërt të karrierës, është shprehur se futbollistët zviceranë janë plotësisht të përgatitur si fizikisht ashtu edhe mendërisht.

“mezi po presim t’ia fillojmë. Jemi gati fizikisht dhe mendërisht. Besoj se kjo do të jetë Kupa e Botës më e mirë për ne”, ka shtuar ai.

Zvicra po merr pjesë në Botërorin e saj të gjashtë radhazi, një arritje që në Evropë e kanë vetëm kombëtare të mëdha si Franca, Spanja, Anglia, Portugalia dhe Gjermania. 

Megjithatë, zviceranët nuk kanë arritur ende të shkojnë larg në turne, pasi në pesë nga gjashtë paraqitjet e fundit janë eliminuar në fazën e 1/8 së finales. Hera e fundit kur Zvicra arriti në çerekfinale ishte në vitin 1954.

Një fitore ndaj Katarit do ta ngjiste Zvicrën në krye të Grupit B, pasi ndeshja tjetër e grupit mes Bosnjë e Hercegovinës dhe Kanadasë përfundoi me rezultat 1:1.

Edhe trajneri i Zvicrës, Murat Yakin, ka thënë se beson që skuadra e tij ka mësuar nga gabimet e së kaluarës. Ai ka kujtuar se shtatëmbëdhjetë futbollistë të ekipit aktual ishin pjesë e Botërorit të kaluar, ku Zvicra u eliminua në 1/8 e finales pas humbjes së thellë 6:1 nga Portugalia.

“Dy të tretat e lojtarëve tanë kanë përvojë në turne të mëdhenj. Kemi mësuar nga e kaluara dhe tani, katër vjet më vonë, jemi më të përgatitur dhe më me përvojë”, ka deklaruar Yakin.

Xhaka pritet të kalojë shifrën e 150 paraqitjeve me kombëtaren gjatë këtij Botërori, ndërsa së bashku me mbrojtësin Ricardo Rodriguez mund të vendosin rekord kombëtar me nga trembëdhjetë ndeshje të luajtura në Kupat e Botës.