Kampionia në fuqi e Kosovës në basketboll, Trepça, ka shënuar një tjetër fitore të madhe, duke mposhtur si mysafire GO+ Peja me rezultat 98:95, pas vazhdimeve.

Ndeshja e xhiros së njëzet e dytë e Superligës, e zhvilluar në palestrën “Karagaçi” në Pejë, ka qenë dramatike nga fillimi deri në fund dhe është vendosur vetëm në sekondat e fundit.

Vendasit e kanë nisur më mirë takimin, duke fituar çerekun e parë 20:13. Por Trepça ka reaguar në periudhën e dytë, të cilën e ka fituar 29:18, për të shkuar në pushim me epërsi 42:38.

Çereku i tretë i ka takuar Pejës me shifrat 26:24, ndërsa në dhjetë minutat e fundit ka pasur rezultat të ngushtë 66:64 për Trepçën. Rreth shtatë minuta e gjysmë para fundit, GO+ Peja ka kaluar në epërsi 71:70 me pikët e Musab Malës.

I njëjti lojtar, një sekondë para përfundimit të kohës së rregullt, ka realizuar për tri pikë për 87:87, duke e çuar ndeshjen në vazhdime.

Edhe pesëminutëshi shtesë ka qenë i baraspeshuar. Heroi i mysafirëve ka qenë Ja’Cori Payne, i cili gjashtë sekonda para fundit ka realizuar treshe vendimtare për 98:95. Në aksionin e fundit, Cecil Williams ka tentuar të barazojë, por gjuajtja e tij ka qenë e pasaktë.

Payne ka qenë më i dalluari me njëzet e shtatë pikë, pesë kërcime dhe tri asistime. Kenny Hasbrouck ka shtuar gjashtëmbëdhjetë pikë, pesë kërcime dhe pesë asistime. Te Peja, Cesare Edwards ka pasur tridhjetë pikë dhe shtatëmbëdhjetë kërcime, por nuk ka arritur ta shmangë humbjen.

Kjo ka qenë fitorja e trembëdhjetë radhazi për Trepçën, seri që ka nisur më 10 dhjetor ndaj Bashkimit. Mitrovicasit vazhdojnë ta kryesojnë Superligën me dyzet e një pikë, pas nëntëmbëdhjetë fitoreve dhe tri humbjeve, ndërsa GO+ Peja mban vendin e katërt me tridhjetë e dy pikë.