Kryetari dhe kandidati për kryetar të Junikut, Ruzhdi Shehu, ka reaguar ashpër pas dështimit të miratimit të buxhetit komunal për vitin 2026 duke akuzuar asamblistët e AAK-së se, me urdhër nga Deçani, kanë bojkotuar mbledhjen e jashtëzakonshme të Kuvendit të Komunës.

Shehu theksoi se, ndonëse seanca ishte thirrur vetëm me një pikë të rendit të ditës – miratimin e buxhetit – mungesa e kuorumit e pamundësoi miratimin e dokumentit më të rëndësishëm financiar të komunës.

“Nga reagimet e tyre publike dhe informacione tjera që kemi, asamblistët e AAK-së kanë marrë urdhër nga Deçani që të mos marrin pjesë në seancë dhe të mos votojnë buxhetin e Junikut. Pra, sërish eksponentët nga jashtë po vendosin për fatin e Junikut dhe të junikasve,” tha Shehu.

Ai falënderoi asamblistët e Vetëvendosjes, Lulzim Gacaferin dhe Eliza Pepshin, për pjesëmarrjen dhe mbështetjen e interesit të përgjithshëm të qytetarëve, pavarësisht dallimeve partiake.

Në reagimin e tij, Shehu vuri në dukje se mosmiratimi i buxhetit dëmton drejtpërdrejt qytetarët, punonjësit e komunës dhe bizneset lokale, ndërsa pengon edhe realizimin e projekteve të rëndësishme infrastrukturore, si rikonstruksioni i rrugës së Zharres, ku ndodhet lapidari i heronjve Arif Gjocaj, Shkëlzen Gacaferi dhe Avdyl Jasiqi.

“Kur nuk e votuat buxhetin, a u turpëruat para gjakut të heronjve? A menduat për pagat e punëtorëve, për bizneset dhe ekonomitë familjare të Junikut?”, pyeti Shehu duke iu drejtuar Agron Kuçit dhe asamblistëve të AAK-së.

Në përfundim, Shehu tha se qytetarët e Junikut do t’i japin përgjigjen e merituar në zgjedhjet e 9 nëntorit:

“Juniku nuk e duron këtë qasje. Për hir të gjakut të dëshmorëve dhe për hir të së ardhmes së Junikut, më 9 nëntor Agron Kuçi do ta marrë përgjigjen e merituar nga të gjithë junikasit pa dallim.” /Kosova.info/