Një nga surprizat më të mëdha të “Roland Garros 2026” u regjistrua këtë të enjte, teksa numri një i botës, Jannik Sinner, u eliminua në mënyrë dramatike nga argjentinasi Juan Manuel Cerundolo pas një ndeshjeje spektakolare me pesë sete.

Italiani dukej drejt një fitoreje të sigurt, pasi kryesonte 6-3, 6-2 dhe 5-1 në setin e tretë, por gjithçka ndryshoi papritur. Gjatë këtij seti, Sinner shfaqi probleme fizike dhe u ankua për shqetësime në stomak, çka ndikoi dukshëm në ritmin dhe energjinë e tij në fushë.

Tenisti italian madje u largua përkohësisht drejt dhomave të zhveshjes për të kontrolluar tensionin e gjakut, por rikthimi në fushë nuk solli reagimin e pritur. Cerundolo përfitoi maksimalisht nga rënia e rivalit, duke fituar pesë game radhazi për të marrë setin e tretë me rezultat 7-5.

Argjentinasi vazhdoi dominimin edhe në setin e katërt, të cilin e fitoi bindshëm 6-1, ndërsa në setin vendimtar Sinner u shfaq sërish pa energji dhe larg formës së tij më të mirë. Cerundolo kompletoi një rikthim të jashtëzakonshëm, duke triumfuar 3-6, 2-6, 7-5, 6-1, 6-1 pas tre orësh e 31 minutash lojë.

Kjo humbje shënon një goditje të rëndë për favoritët e turneut, ndërsa Juan Manuel Cerundolo siguron një nga fitoret më të mëdha të karrierës së tij dhe kalimin në fazën tjetër të Grand Slam-it francez.