Manchester United e nisi sezonin e ri të Premier League me një humbje minimale 1-0 ndaj Arsenalit, me golin vendimtar të shënuar nga Riccardo Calafiori.

Përveç rezultatit negativ, trajneri Ruben Amorim regjistroi edhe një statistikë të padëshiruar.

Sipas të dhënave të “Opta”, portugezi ka humbur 15 nga 28 ndeshjet e tij në Premier League (me shtatë fitore dhe gjashtë barazime). Kjo e bën atë trajnerin që ka arritur më shpejt këtë kuotë humbjesh në elitën angleze, pa qenë në krye të një ekipi të sapo-promovuar, që nga Paul Hart me Portsmouth në vitin 2009 (27 ndeshje).

Megjithëse United tregoi momente premtuese ndaj Arsenalit, rekordi negativ është një sinjal shqetësues për trajnerin, i cili ende kërkon të stabilizojë skuadrën e tij.

“Të kuqtë” do të kenë mundësinë të reagojnë javën e ardhshme, kur do të përballen me Fulham në udhëtim. Ndërkohë, një ditë më parë, Arsenali i Mikel Artetës pret në shtëpi të sapo-promovuarit e Leeds United.