Policia e Kosovës, respektivisht Njësia për Ndërhyrje të Shpejtë – Veri, ka parandaluar sot një rast të rëndësishëm të kontrabandimit me mallra në afërsi të vijës kufitare me Serbinë. Rreth orës 10:40, në fshatin Joshanicë të komunës së Leposaviqit, zyrtarët policorë kanë ndaluar një furgon të dyshuar me targa të Serbisë.

Gjatë kontrollit të automjetit, njësia policore ka zbuluar 62 thasë të mbushur me kafe, me peshë totale rreth 3600 kilogramë. Nga të dhënat fillestare, dyshohet se kjo sasi e konsiderueshme e kafes është futur në territorin e Republikës së Kosovës përmes rrugëve ilegale nga Serbia, me qëllim kontrabandimi.

Me autorizim të Prokurorit të Shtetit, është intervistuar një person i dyshuar i lidhur me rastin, i cili pas procedurave të para është liruar. Ndërkohë, automjeti dhe malli i sekuestruar janë dërguar në terminalin doganor për trajtim të mëtutjeshëm dhe procedura të tjera ligjore, nën koordinimin e Policisë së Kosovës dhe Doganës së Kosovës.

Policia e Kosovës thekson se mbetet e përkushtuar në parandalimin dhe luftimin e të gjitha formave të kontrabandës, duke siguruar integritetin e kufirit dhe mbrojtjen e ekonomisë së vendit. /Kosova.info/