Është e rëndësishme që Britania e Madhe të vazhdojë të tregojë se po e mbështet Ukrainën për një kohë të gjatë, tha të shtunën kryeministri, Boris Johnson, duke paralajmëruar për rrezikun e “lodhjes së Ukrainës” ndërsa lufta po zvarritet.

“Rusët janë duke ecur përpara centimetër pas centimetri dhe është jetike për ne që të tregojmë atë që është e vërtetë, Ukraina mund ta fitojë dhe do ta fitojë luftën”, u tha Johnson gazetarëve pas rikthimit të sotëm në Londër, ku gjatë ditës së djeshme kishte udhëtuar papritur drejt Kievit.

Disa anëtarë të Partisë së tij Konservatore e kishin kritikuar atë për udhëtimin në vend që të merrte pjesë në një konferencë në Anglinë veriore, raporton theguardian.

“Kur po fillon lodhja rreth angazhimit për Ukrainën, është shumë e rëndësishme të tregojmë se jemi me ta për një kohë të gjatë dhe po u japim atyre qëndrueshmërinë strategjike që u nevojitet”, tha Johnson.

Theksojmë se i pari i qeverisë britanike gjatë takimit me presidentin ukrainas, Volodymyr Zelensky ka deklaruar se i ka ofruar Ukrainës trajnimin e 10 mijë ushtarëve për të përballuar agresionin rus.

Ndryshe, Ukraina ka dhënë përditësimin e saj të fundit mbi numrin e humbjeve që ka pësuar Rusia që nga fillimi i luftës më 24 shkurt.

Ukrainasit pretendojnë se 33,350 trupa ruse janë vrarë dhe 3,573 automjete të blinduara të personelit janë shkatërruar.