Barcelona ka pësuar humbje ndaj Osasunës në udhëtim me rezultat 4-2 në kuadër të javës së tetë në elitën e futbollit spanjoll.

Kjo ishte humbja e parë e blaugranasve këtë sezon pasi deri më tani kishin rekord qind për qind të fitoreve.

Vendasit në harkun e dhjetë minutave arritën që të shënojnë dy gola.

Ante Budimir (18′) shënoi për rezultatin 1-0 ndërsa Bryan Zaragoza (28′) realizoi për 2-0.

Në pjesën e dytë Barcelona ia doli ta gjejë rrugën e golit dhe këtë e bëri përmes Pau Victor (53′) për 2-1.

Sidoqoftë, Osasuna iu kundëpërgjigj duke realizuar edhe dy herë të tjera me Ante Budimir (73′) dhe Abel Bretones (85′).

Lamine Yamal e gjeti golin në minutën e 89-të duke shënuar për rezultatin përfundimtar 4-2.

Pas kësaj humbje Barcelona mbetet në vendin e parë me 21 pikë, por rivali Real Madridi nesër mund ta ngushtojë në vetëm një pikë diferencën me blaugranasit nëse nesër (e diel) fiton derbin ndaj Atletico Madridit.