Liverpool e ka nisur mbrojtjen e titullit të Premier League me fitore 4-2 ndaj Bournemouth, në një ndeshje dramatike ku mysafirët kanë barazuar nga 2-0, por janë dorëzuar në fund.

Skuadra e Arne Slot, me katër debutues në Premier League, e ka nisur ndeshjen më mirë. Mohamed Salah ka rrezikuar i pari dhe më pas ka asistuar për Virgil van Dijk, por ky i fundit ka goditur mbi portë.

Goli i parë ka ardhur në minutën e tridhjetë e shtatë nga Hugo Ekitike, pas një asistimi të Alexis Mac Allister dhe një devijimi nga Marcos Senesi.

Pesë minuta pas fillimit të pjesës së dytë, Ekitike ka qenë asistues për Cody Gakpo, që e ka dyfishuar rezultatin.

Por Bournemouth nuk është dorëzuar. Fillimisht Antoine Semenyo ka shënuar pas një krosimi të saktë të David Brooks dhe më pas ka barazuar me një depërtim të shpejtë në qendër, duke shfrytëzuar boshllëqet në mbrojtjen e Liverpool.

Megjithatë, kampioni në fuqi ka reaguar. Në minutat e fundit, Federico Chiesa e ka realizuar golin e tij të parë në Premier League, ndërsa Salah e ka vulosur fitoren.

Premier league zhvillon nesër edhe pesë ndeshje të tjera.