Lazio ka siguruar një pikë të artë ndaj Juventusit në “Stadio Olimpico” të Romës, falë një goli të Matias Vecino në minutat e fundit të ndeshjes, që ka përfunduar me rezultatin 1-1.

Ky barazim i mban të dyja skuadrat në luftë të ngushtë për një vend në Champions League, duke qenë se tani kanë pikë të barabarta.

Rastet e pastra kanë qenë të pakta në pjesën e parë, me përjashtim të një goditje të Fisayo Dele-Bashiru që ka përfunduar në rrjetën anësore. Juventus është dukur më këmbëngulës në fundin e pjesës së parë, kur Alberto Costa i është afruar golit, por pa sukses.

Skuadra nga Torino e ka nisur më mirë pjesën e dytë dhe e ka gjetur golin vetëm gjashtë minuta pas rifillimit, kur Weston McKennie ka harkuar saktë për Randal Kolo Muanin, i cili ka shënuar me kokë, pavarësisht tentimit të portierit Mandas për ta ndalur topin.

Megjithatë, Juventus nuk i ka shkuar gjithçka sipas planit. Një veprim i Pierre Kalulus ka rezultuar me karton të kuq, duke e lënë skuadrën me një lojtar më pak për më shumë se gjysmë ore. 

Lazio e ka shfrytëzuar epërsinë numerike dhe e ka rritur presionin në pjesën e fundit të takimit. Në minutat shtesë, Pedro ka goditur me kokë, portieri nuk e ka kontrolluar mirë dhe Vecino e ka dërguar topin në rrjetë nga afërsia për të barazuar shifrat në 1-1.

Pas kësaj ndeshje Lazio gjendet në vendin e pestë me pikë të barabarta me Juventusin, ndonëse ka zhvilluar një ndeshje më shumë se Roma që ndodhet në pozitën e gjashtë.

Në xhiron e ardhshme, Lazio e pret një përballje shumë e vështirë në “San Siro” ndaj Inter, ndërsa Juventus, që tani mban vendin e katërt, e ndien gjithnjë e më shumë presionin nga skuadrat që janë në ndjekje për zonën Champions. Në krye të tabelës së Serie A gjendet Napoli.