Zyra e Kryeprokurorit të Shtetit, dënon kërcënimin që i është bërë Zyrtarit të Lartë për Komunikim me Publikun në Prokurorinë Themelore të Pejës, Shkodran Nikçit.

“Këto kërcënime vijnë si rrjedhojë e prononcimeve të punës së tij zyrtare lidhur me veprimet e ndërmarra nga Prokurori i Shtetit për rastin e rrahjes në një diskotekë në Pejë, ku ishin të përfshirë shtetas të Republikës së Shqipërisë”, thuhet në komunikatën e Kryeprokurorisë.

Prokurori i Shtetit thotë se kërcënuesi do të përgjigjet sa më parë para drejtësisë.

“Prokurori i Shtetit në bashkëpunim me institucionet tjera ligj zbatuese dhe autoritetet shqiptare do t’i ndërmarrë të gjitha veprimet ligjore dhe do ta trajtojnë me seriozitet të lartë këtë çështje, në mënyrë që kërcënuesi të përgjigjet sa më parë para drejtësisë”, përfundon komunikata e KPK-së. /Kosova.info/