Të dënuarit për terrorizëm që mbahen në Burgun e Dubravës kanë mundësinë të ndjekin një trajtim të veçantë që përfshin programe edukimi dhe ri-socializimi, të dizajnuara për t’i mbështetur në përballimin e jetës jashtë burgut. Ky program është adoptuar në këtë burg për të menaxhuar të dënuarit që vuajnë dënime për vepra penale të terrorizmit.

Në një ndërtesë të posaçme shumëkatëshe, me kapacitet për rreth 50 të burgosur, aktualisht janë të strehuar 10 të dënuar për terrorizëm. Gjatë qëndrimit të tyre, ata përfitojnë trajnime profesionale dhe kanë mundësi për t’u angazhuar në aktivitete të ndryshme.

Afër qendrës janë të vendosura një bibliotekë, një sallë sporti dhe kurse profesionale, të cilat mund t’i ndjekin të dënuarit në mënyrë vullnetare.

Që prej disa vitesh, Shërbimi Korrektues i Kosovës ka vendosur t’i izolojë të burgosurit për terrorizëm në një zonë të veçantë ku ndjekin programe specifike të trajtimit të drejtuara nga psikologë, psikiatër dhe punonjës socialë të burgut.

Drejtuesit e burgut konfirmojnë se pjesëmarrja në këto programe është tërësisht vullnetare.

Qendra Korrektuese e Dubravës është një burg i tipit të mbyllur, që mban të burgosur me dënime nga 3 muaj deri në 15 vite. Momentalisht, aty janë të vendosur 10 të dënuar për vepra penale të terrorizmit, ndonëse kapaciteti i pavijonit mund të strehojë deri në 30 të dënuar për këtë kategori.

Sami Gashi, drejtori i burgut, thotë: “Ne kemi një pavijon të veçantë për të dënuarit për terrorizëm dhe ekstremizëm, që nga viti 2017.”

Punonjësi social, Muhamet Dervishaj, thekson se programet përfshijnë seanca për menaxhimin e zemërimit dhe qëllimi i tyre është të ndihmojnë të burgosurit për të përballuar situatat konfliktuale. Ata që tregojnë rezultate të mira certifikohen në fund të trajnimeve.

Përmes këtyre programeve, synohet të përmirësohen sjelljet e të burgosurve dhe të përgatiten për një kthim të suksesshëm në shoqëri pas lirimit të tyre. Programet përfshijnë edhe certifikime profesionale, si kuzhinier, furrtar, saldues, hidroinstalues, elektricist, zdrukthëtar e të tjera.

Brenda kompleksit ndodhen gjithashtu shkolla, teatro, salla sporti dhe punëtori ku të burgosurit mund të punojnë e të ndjekin arsimimin në shkolla profesionale, duke marrë edhe diploma.

Sipas SHKK-së, shumica e të dënuarve për terrorizëm që përfundojnë programet e trajnimit nuk ri-arrestohen. Programet kanë ndihmuar disa prej tyre të ndërtojnë jetë të reja jashtë burgut, me raste suksesi ku disa kanë hapur biznese të mbështetura nga donatorë.