Iran ka bërë të ditur se është plotësisht i përgatitur për pjesëmarrje në Kupën e Botës 2026, duke i dhënë fund çdo paqartësie rreth pranisë së tij në turneun që do të zhvillohet në SHBA, Meksikë dhe Kanada.

Zëdhënësja e qeverisë, Fatemeh Mohajerani, deklaroi për transmetuesin shtetëror IRIB se institucionet përgjegjëse kanë përmbushur të gjitha përgatitjet e nevojshme për pjesëmarrjen e ekipit kombëtar.

Ky qëndrim i qartë zyrtar vjen në një moment kur kishte ende diskutime mbi mundësinë e tërheqjes, duke zbehur çdo skenar alternativ, përfshirë edhe shpresat e Italisë për një ndryshim të mundshëm në përbërjen e turneut.

Vetëm një ditë më parë, ministri i Sportit dhe Rinisë, Ahmad Donyamali, kishte lënë të hapur mundësinë e një vendimi tjetër, duke theksuar se përgatitjet sportive janë në vazhdim, ndërsa vendimi final i takon autoriteteve shtetërore. Ai bëri të ditur se kombëtarja është planifikuar të zhvillojë një kamp stërvitor më 21 maj pranë territorit vendas, me një qëndrim prej rreth një jave.

Sipas tij, pjesëmarrja do të varej nga garantimi i sigurisë për lojtarët dhe nga shmangia e tensioneve me vendet pritëse, por deklarata e fundit e qeverisë duket se e ka mbyllur këtë çështje, duke konfirmuar praninë e Iranit në Botërorin e vitit 2026.