Kryetari aktual dhe kandidati për kryetar të Komunës së Vitisë, Sokol Haliti, ka zhvilluar një takim elektoral në fshatin Kabash, ku është pritur me entuziazëm nga banorët e zonës.

Haliti u shpreh mirënjohës për mikpritjen tradicionale të banorëve të Kabashit duke e cilësuar këtë vend si shembull të tolerancës fetare, traditës, arsimit, sportit dhe kulturës. Ai theksoi se qytetarët i kanë falënderuar për punën e bërë deri më tani, por edhe për projektet e reja që do të realizohen në të ardhmen.

“Kabashi na priti ashtu siç di më së miri ta bëjë këtë punë! Vendi i tolerancës, arsimit e kulturës na falënderoi sonte për punën tonë, por edhe për investimet e ardhshme,” tha Haliti.

Në këtë takim, Haliti ishte i shoqëruar nga kandidati për asamblist, Ramadan Deliu, me të cilin morën përkrahje të parezervë nga banorët e Kabashit.

“Faleminderit nga zemra për mbështetjen dhe besimin që po na jepni çdo ditë. Bashkë do ta çojmë përpara zhvillimin e Vitisë,” shtoi Haliti. /Kosova.info/