Aeroplanmbajtësja franceze e helikopterëve “Dixmude” do të mbërrijë në Mesdheun Lindor në ditët në vijim, konfirmoi ushtria franceze. Ky veprim është ndërmarrë në rast se do të merret vendimi për evakuimin e shtetasve të huaj nga Libani, duke pasur parasysh kërcënimin në rritje të përshkallëzimit të konfliktit në rajon.

Për disa kohë, vendet perëndimore kanë shqyrtuar opsionet se si të evakuojnë në mënyrë të sigurt qytetarët e tyre nga Libani nëse shpërthen një luftë e gjithanshme. Qiproja dhe, ndoshta, Turqia po konsiderohen si strehë potenciale për dhjetëra mijëra njerëz.

Franca, e cila ka rreth 20 mijë shtetas të saj në Liban, dërgoi transportuesin “Dixmude” nga porti ushtarak në Toulon. Ky veprim është pjesë e një plani më të gjerë për përgatitjen e evakuimit dhe dhënien e ndihmës në rast të përkeqësimit të situatës në terren.

Masa vjen pasi shqetësimet rriten për përshkallëzimin e konfliktit midis Izraelit dhe Hezbollahut në kufirin verior të Libanit, gjë që mund të çojë në nevojën për evakuimin e shtetasve të huaj nga vendi.

Ushtria izraelite ka kryer tashmë sulme të kufizuara dhe të synuara në pozicionet e Hezbollahut, me pamjet që tregojnë njësitë e divizionit elitar 98-të të parashutës dhe Brigadës së 7-të të blinduar që hyjnë në territorin libanez. Përleshjet mes forcave izraelite dhe Hezbollahut po përshkallëzohen në Libanin jugor dhe ka frikë serioze se situata mund të përshkallëzohet në një luftë të gjithanshme. /Kosova.info/