Ministri i Punëve të Jashtme i Serbisë, Ivica Daçiq, tha se pozicioni serb ndaj planit franko-gjerman, është “i qartë dhe i përgjegjshëm” në atë që dialogu ndërmjet Kosovës dhe Serbisë duhet të vazhdojë.
Daçiq duke u përgjigjur në pyetjet për gazetarë, tha se Presidenti i Serbisë, Aleksandar Vuçiq, ka deklaruar se cilat janë “vijat e kuqe” për këtë, e cila është se nuk do të lejojnë anëtarësimin e Kosovës në Orgnaizatën e Kombeve të Bashkuara.
“Kjo është tejet e rëndësishme sepse edhe pata mundësinë të dëgjojë vlerësimet në Bruksel që Vuçiq u soll konstruktivisht dhe me përgjegjësi, për dallim nga Prishtina, dhe mendoj se është tejet e rëndësishme ta ruajmë shtetin dhe interesat tona kombëtare, por edhe që ta ruajmë Serbinë nga kërcënimet e ndryshme, shantazhet, sanksionet e mundshme dhe gjithçka që mund të kërcënojë të ardhmen e qytetarëve serbë”, ka thënë ai.
Kujtojmë se ishte i pari Ivica Daçiq ai i cili kishte dalë kundër planit franko-gjerman, ku thoshte se ky plan e merrte të mirëqenë pavarësinë e Kosovës dhe se kjo ishte premisë bazike e saj.
Mes tjerash, Daçiq shprehej se Serbia nuk do ta njeh Kosovën “as formalisht as informalisht” dhe se nuk do të lejonin anëtarësimin e Kosovës në OKB.
Ishte vetëm ditëve të fundit pas vizitës së “pesëshesh së madhe” diplomatike kur Aleksandar Vuçiq doli publikisht dhe pohoi se kishte pranuar planin franko-gjerman.
Vuçiq në dramaticitetin e tij të kahershëm tha se ka patur “rezervë” vetëm për një çështje tejet të rëndësishme, por që nuk e kishte specifikuar. Por deklarimi i sotëm i Daçiqit, lë të kuptohet se kjo ishte “rezerva” e madhe që kishte shprehur presidenti serb.
