Jannik Sinner ka dhuruar një paraqitje të jashtëzakonshme në gjysmëfinale të Wimbledon, duke e eliminuar Novak Djokovic dhe duke siguruar një vend në finalen e turneut prestigjioz londinez.

Tenisti italian, kampioni në fuqi i Wimbledon dhe numri një në botë, triumfoi bindshëm me rezultatin 3:0 në sete, 6-4, 6-4, 6-4.

Sinner ka qenë dominues gjatë gjithë ndeshjes dhe nuk i ka dhënë shumë mundësi kundërshtarit, i cili synonte të arrinte titullin e 25-të Grand Slam në karrierë.

“Do të thotë shumë për mua që jam sërish në finale këtu. Ky është turneu më i veçantë që kemi”, ka thënë Sinner pas ndeshjes.

Njëzet e katër vjeçari do të luajë në finale ndaj gjermanit Alexander Zverev, i cili më herët ka eliminuar britanikun Arthur Fery. Ai do të kërkojë titullin e pestë Grand Slam në karrierë.

Sinner hyn si favorit në përballjen për titull, pasi ka fituar nëntë përballjet e fundit ndaj Zverevit.

“E dija se sot duhej ta ngrija nivelin tim të lojës dhe mendoj se ia dola. Jam i lumtur që jam përsëri në finale dhe shpresojmë të kemi një ndeshje të bukur të dielën”, është shprehur ai.