Agjencitë amerikane të inteligjencës kanë vlerësuar se Arabia Saudite tani është duke i prodhuar në mënyrë aktive raketat e veta balistike me ndihmën e Kinës, ka mësuar televizioni CNN.

Dihet që Arabia Saudite ka blerë raketa balistike nga Kina në të kaluarën, por kurrë nuk ka qenë e gatshmë për t’i prodhuar të vetat – deri tani, sipas tri burimeve të afërta me inteligjencën. Pamjet satelitore të siguruara nga televizioni CNN sugjerojnë se Arabia Saudite gjithashtu është duke prodhuar armë të paktën në një lokacion.

Zyrtarët amerikanë në disa agjenci, përfshirë Këshillin e Sigurisë Kombëtare në Shtëpinë e Bardhë, janë informuar në muajt e fundit nga inteligjenca e klasifikuar për transferime të shumta e të mëdha të teknologjisë së ndjeshme për raketa balistike mes Kinës e Arabisë Saudite, sipas dy burimeve  të afërta me vlerësimet e fundit.

“Përderisa vëmendje e konsiderueshme është përqendruar në programin e madh të Iranit për raketa balistike, zhvillimi i Arabisë Saudite dhe tani prodhimi i raketave balistike nuk e ka marrë nivelin e njëjtë të vështrimit”, tha Jeffrey Lewis, ekspert i armëve dhe profesor në Institutin Middlebury për Studime Ndërkombëtare.

“Prodhimi vendës i raketave balistike nga Arabia Saudite sugjeron se çfarëdo përpjekje diplomatike për kontrollimin e prodhimit të raketave do të duhej të përfshinte aktorë tjerë rajonalë, si Arabia Saudite e Izraeli, që i prodhojnë raketat e veta balistike”, shtoi Lewis.

I pyetur nëse ka pasur së fundi transferim të teknologjisë së ndjeshme për raketa balistike mes Kinës e Arabisë Saudite, një zëdhënës i Ministrisë së Jashtme të Kinës i tha televizionit CNN se dy vendet janë “partnerë strategjikë gjithëpërfshirës dhe kanë mbajtur bashkëpunim miqësor në të gjitha fushat, përfshirë fushën e tregtisë ushtarake”.