Talenti i ri i futbollit kosovar, Art Shahini, ka shkëlqyer në Turneun Dimëror – Liga Pro për kategorinë U11 duke u shpallur Kampion U11 dhe njëkohësisht Lojtari më i Mirë i Turneut, pas paraqitjeve mbresëlënëse gjatë gjithë garës.

Në një turne ku morën pjesë 12 ekipe, ekipi i Art Shahinit dominoi plotësisht konkurrencën duke regjistruar 11 fitore pa asnjë humbje dhe duke realizuar gjithsej 27 gola. Nga këta, plot 21 gola u shënuan nga vetë Art Shahini, ndërsa ai kontribuoi edhe me 4 asistime duke u konfirmuar si lojtari më efikas dhe më ndikues i turneut.

Finalja u zhvillua në kuadër të “El Clasico Vushtrri” kundër ekipit Rilindja, ku El Clasico triumfoi me rezultat 3–1. Edhe në ndeshjen vendimtare, Art Shahini ishte protagonisti kryesor, me 1 gol dhe 2 asistime, çka i siguroi çmimin Lojtari më i Mirë i Ndeshjes dhe vlerësimin si lojtari që bëri diferencën.

Familja Shahini, pas këtij suksesi, u shpreh: “Ky sukses është rezultat i punës së madhe, disiplinës dhe dashurisë për futbollin. Jemi shumë krenarë për Artin dhe rrugën që po ndërton në klubin El Clasico.”

Ky triumf i Art Shahinit dëshmon potencialin e madh që ai posedon dhe njëkohësisht thekson rëndësinë e investimit dhe zhvillimit të talenteve të reja në futbollin kosovar. /Kosova.info/