Ka përfunduar aksioni anti-drogë i cili u zhvillua mëngjesin e sotëm në zonën e Dukagjinit, nga Njësitë Speciale të Policisë së Kosovës nën udhëheqjen e Prokurorisë së Pejës.

Prokurori Ersan Qavolli tha se nga ky aksion janë arrestuar shtatë persona dhe janë bastisur 10 lokacione në Deçan e Gjakovë.

Gjithashtu, ai bëri të ditur se janë konfiskuar 180 bimë narkotike të llojit marihuanë të gjata 2 deri në 4 metra.

“Janë bastisur 10 lokacione nën dyshimin për narkotikë, me ç’rast janë sekuestruar sasi të ndryshme të llojeve të narkotikëve, përfshirë kanabis dhe kokainë dhe prova të tjera materiale, të cilat do të shërbejnë për ndriçimin e kësaj çështje penale”.

“Aktualisht në një plantacion janë diku 180 bimë narkotike të llojit marihuanë të cilat janë duke u asgjësuar nga njësitë relevante policore me urdhër të Prokurorit të Shtetit”, tha Qavolli.

Tutje, ai deklaroi se hetimet që rezultuan me aksionin e sotëm kanë nisur shumë kohë më parë.