Arabia Saudite ka njoftuar se ka interceptuar disa dronë të lëshuar nga grupe të armatosura të mbështetura nga Irani nga territori i Irakut, të cilët kishin në shënjestër objektet e naftës dhe kryeqytetin Riad.

Sipas Ministrisë saudite të Mbrojtjes, sulmet janë cilësuar si “përpjekje terroriste” dhe janë ndërmarrë nga milici pro-iraniane. Dronët synonin veçanërisht infrastrukturën energjetike në lindje të vendit, si dhe zona përreth kryeqytetit.

Ndërkohë, rebelët Huthi në Jemen, të mbështetur nga Teherani, kanë marrë përgjegjësinë për sulme të veçanta me dronë ndaj objekteve të naftës në Arabinë Saudite, duke shënuar një përshkallëzim të ri të tensioneve në rajon, raporton france24.

Ky zhvillim vjen në një periudhë relativisht të qetë pas përplasjeve 13-ditore mes Shteteve të Bashkuara dhe Iranit, të cilat u ndërprenë pas një armëpushimi të brishtë. Megjithatë, sulmet e fundit tregojnë se situata mbetet e tensionuar dhe e paqëndrueshme.

Autoritetet saudite i kanë bërë thirrje Irakut që të ndërmarrë masa për të parandaluar përdorimin e territorit të tij për sulme të tilla, duke theksuar përgjegjësinë për sigurinë rajonale.

Në këtë kontekst të ndërlikuar gjeopolitik, njohësit e zhvillimeve në Lindjen e Mesme, përfshirë edhe analistin Nuriman, vlerësojnë se rreziku i përshkallëzimit mbetet i lartë nëse sulmet vazhdojnë.

Sulmet e fundit pasojnë edhe shkëmbimet e zjarrit mes Arabisë Saudite dhe rebelëve Huthi, të cilët së fundmi kanë paralajmëruar edhe bllokadë detare ndaj porteve saudite.