Presidenti i FIFA-s, Gianni Infantino, ka publikuar një mesazh të gjatë në llogarinë e tij personale në Instagram dhe në kanalet zyrtare të FIFA-s, ku i akuzon kritikët e Kampionatit Botëror 2026 për “përhapje urrejtjeje”. Infantino i ftoi ata që të “reflektojnë, meditojnë, të luten ose të shikojnë një ndeshje futbolli”.

Në deklaratën e tij, Infantino mbrojti menaxhimin e turneut nga FIFA, duke pretenduar se nuk ka pasur dhunë apo incidente, duke shtuar se siguria ishte në nivelin 100 për qind. Ai falënderoi qeveritë e Kanadasë, Meksikës dhe Shteteve të Bashkuara, si dhe forcat e policisë dhe vullnetarët për organizimin e turneut.
Sipas tij, 7 milionë njerëz nga më shumë se 200 vende kanë ndjekur ndeshjet.

Mesazhi i Infantinos erdhi pas një periudhe kritikash ndaj FIFA-s, lidhur me kufizimet e vizave në SHBA që prekën tifozë dhe zyrtarë nga vende si Irani, Haiti, Senegali dhe Bregu i Fildishtë. Infantino mbrojti procesin e vizave, duke deklaruar se miliona të tjerë u aprovuan.
Gjithashtu, gjyqtari somalez Omar Artan nuk mundi të hynte në SHBA pasi iu refuzua viza.

Një tjetër pikë e diskutueshme ishte vendimi për të pezulluar ndalimin automatik prej një ndeshjeje për sulmuesin amerikan Folarin Balogun, pasi ai u përjashtua me karton të kuq kundër Bosnjë-Hercegovinës. Presidenti amerikan Donald Trump zbuloi se kishte biseduar me Infantinon për këtë rast përpara se FIFA të konfirmonte se Baloguni do të ishte i gatshëm për ndeshjen kundër Belgjikës. Ky vendim nxiti akuza për ndërhyrje politike nga UEFA, Federata Belge e Futbollit dhe ligjvënës evropianë.

Pa iu referuar drejtpërdrejt incidentit, Infantino shkroi se vendimet e diskutueshme të gjyqtarëve ose vendimet disiplinore janë rutinë në disa nga ligat më të mëdha në botë. Federata Norvegjeze e Futbollit ka konfirmuar se synon të bëjë një ankesë zyrtare në FIFA lidhur me rolin e Trumpit në rastin e Balogunit.

Infantino u shpreh se kritikët kanë humbur “gëzimin dhe bashkimin” e turneut. Ai shtoi se ndërsa kritikët qëndrojnë pas stilolapsave dhe ekraneve, FIFA punon në vijën e parë për të organizuar turneun.