Rikthimi i Jose Mourinhos te Real Madridi duket se ka sjellë një ndryshim të madh në strategjinë sportive të klubit.

Sipas mediave ndërkombëtare, trajneri portugez ka marrë një rol kyç në vendimmarrjen për transferimet, duke favorizuar afrimin e lojtarëve me përvojë dhe të gatshëm për sukses të menjëhershëm.

Epoka e re në “Santiago Bernabéu” thuhet se nisi me një takim të mbajtur më 9 qershor në Madrid, ku Mourinho u takua me drejtorin e përgjithshëm Jose Angel Sanchez, shefin e skautimit Juni Calafat dhe agjentin e njohur Jorge Mendes për të diskutuar planet e afatit kalimtar veror.

Ndryshe nga vitet e fundit, kur Real Madridi ishte fokusuar kryesisht te talentet e reja, këtë verë klubi po orienton investimet drejt futbollistëve të konsoliduar.

Arritjet e Marco Cucurellas, Bernardo Silvës dhe Ibrahima Konates, si dhe afrimi i pritshëm i Denzel Dumfries, tregojnë qartë drejtimin e ri të klubit.

Mourinho besohet se ka qenë vendimtar në transferimin e Cucurellas nga Chelsea për 55 milionë euro. Po ashtu, ai këmbënguli për afrimin e Bernardo Silvës, i cili iu bashkua madrilenëve me parametra zero pas largimit nga Manchester City.

Trajneri portugez synon të ndërtojë një skuadër që mund të luftojë menjëherë për trofetë më të mëdhenj, duke i dhënë përparësi përvojës, lidershipit dhe mentalitetit fitues.

Megjithatë, puna e Real Madridit në afatin kalimtar nuk pritet të përfundojë këtu. Klubi vazhdon të monitorojë disa emra të mëdhenj, me mesfushorin e Chelseat, Enzo Fernandez, dhe mbrojtësin e Manchester Cityt, Ruben Dias, që konsiderohen objektiva prioritare.

Në listën e dëshirave ndodhen gjithashtu Mateus Fernandes i West Hamit dhe talenti i ri francez Ayyoub Bouaddi i Lille.

Ndërkohë, ardhja e lojtarëve të rinj mund të sjellë edhe largime nga skuadra. Dani Ceballos raportohet se mund të largohet para përfundimit të kontratës së tij, ndërsa e ardhmja e Vinicius Junior vazhdon të mbetet një nga çështjet më të diskutuara në klub.

Kontrata e brazilianit skadon në vitin 2027 dhe negociatat për rinovimin janë pezulluar deri në përfundim të Kupës së Botës 2026. Drejtuesit e Real Madridit do të duhet të vendosin nëse do të plotësojnë kërkesat financiare të yllit brazilian apo do të shqyrtojnë mundësinë e një transferimi të bujshëm.

Me Mourinhon në krye, Real Madridi duket i vendosur të ndryshojë kursin dhe të rikthehet menjëherë në majën e futbollit evropian dhe botëror.