Një armëpushim i brishtë mes SHBA-së dhe Iranit tregoi shenja tensioni të shtunën, pasi Teherani kërcënoi se do ta mbyllë sërish Ngushticën e Hormuzit për shkak të bllokadës detare amerikane.

Irani paralajmëroi se do ta mbyllë këtë rrugë strategjike ujore nëse Uashingtoni vazhdon të bllokojë portet iraniane, vetëm disa orë pasi kishte deklaruar se ngushtica ishte rihapur pas armëpushimit në Liban.

Presidenti amerikan Donald Trump u shpreh se një marrëveshje paqeje mes SHBA-së dhe Iranit është “shumë afër”, duke thënë se Teherani ka rënë dakord të dorëzojë uraniumin e pasuruar, pretendim që Irani e mohoi duke theksuar se rezervat nuk do të dorëzohen.

Teherani paralajmëroi gjithashtu se nëse anijet që nisen nga portet iraniane ndalohen nga forcat amerikane, Ngushtica e Hormuzit – përmes së cilës kalon rreth një e pesta e naftës dhe gazit të lëngshëm në botë – mund të mbyllet sërish.

Kryetari i Parlamentit iranian, Mohammad Bagher Ghalibaf, deklaroi se me vazhdimin e bllokadës ngushtica nuk do të mbetet e hapur, ndërsa zëdhënësi i Ministrisë së Jashtme, Esmaeil Baqaei, e cilësoi bllokadën shkelje të armëpushimit dhe paralajmëroi përgjigje nga Irani.

Sipas Komandës Qendrore të SHBA-së, 21 anije janë detyruar të kthehen që nga fillimi i bllokadës këtë javë.

Pavarësisht tensioneve, Donald Trump deklaroi se një marrëveshje është shumë afër, por paralajmëroi se bllokada detare do të vazhdojë nëse nuk arrihet një marrëveshje, duke mos përjashtuar mundësinë e zgjatjes së armëpushimit. /Burimi: Euro News/