Barcelona ka shënuar fitore 2:0 ndaj Osasuna, duke u shkëputur përkohësisht me shtatë pikë në krye të LaLiga.

Goli i parë dhe i dytë i katalanasve u realizuan nga braziliani Raphinha, i cili ishte vendimtar në pjesën e dytë të ndeshjes.

Skuadra e trajnerit Hansi Flick e ka dominuar takimin që nga fillimi, pavarësisht se Osasuna është mbrojtur me pesë lojtarë në vijën e fundit.

Barcelona ka krijuar disa raste, por është përballur me pritje të mira të portierit Sergio Herrera, ndërsa një gol i Ferran Torres është anuluar nga VAR për pozicion jashtë loje.

Pas shumë përpjekjesh, goli ka ardhur në minutën e shtatëdhjetë, kur Raphinha ka shënuar me një goditje të fortë.

Barcelona e ka vazhduar presionin edhe pas epërsisë, ndërsa Osasuna ka tentuar të rrezikojë vetëm nga kundërsulmet.

Fitorja është vulosur në minutat e fundit, kur Raphinha ka realizuar edhe golin e dytë, duke i siguruar tri pikë të plota Barcelonës.

Me këtë rezultat, Barcelona ka tani tetë fitore radhazi në shtëpi. Ndërsa, Osasuna e ka pësuar humbjen e parë pas pesë ndeshjesh dhe mbetet në zonën e rrezikut në tabelë.