Emiratet e Bashkuara Arabe kanë paralajmëruar Izraelin se aneksimi i Bregut Perëndimor të okupuar do të kalonte “vijën e kuqe” dhe do të minonte frymën e Marrëveshjeve të Abrahamit, të cilat normalizuan marrëdhëniet mes dy vendeve.

Lana Nusseibeh, ndihmësministre për Çështje Politike dhe emisare e ministrit të Jashtëm të Emirateve, tha se një veprim i tillë do të ishte “kambana e fundit” për zgjidhjen me dy shtete të konfliktit izraelito-palestinez.

Ajo i bëri këto komente pasi ministri izraelit i Financave, nga e djathta ekstreme, zbuloi një propozim për aneksimin e rreth katër të pestave të Bregut Perëndimor.

Izraeli ka ndërtuar rreth 160 vendbanime ku sot jetojnë afërsisht 700 mijë hebrenj, që prej pushtimit të Bregut Perëndimor dhe Jerusalemit Lindor gjatë luftës së vitit 1967, territore që palestinezët, së bashku me Gazën, i shohin si pjesë të një shteti të ardhshëm palestinez. Sipas së drejtës ndërkombëtare, këto vendbanime konsiderohen të paligjshme.