Presidentja Vjosa Osmani në një konferencë për media, ka thënë se Serbia në fund të muajit maj, ka pasur plane destabilizuese për Kosovën nëpërmjet kufirit.

“Në të gjitha takimet gjatë këtyre dy vizitave natyrshëm kemi folur edhe për zhvillimet e fundit të sigurisë. Siç e dini gjatë vizitës sime në SHBA kam deklaruar se Serbia ka pasur, dhe ka ende qëllim që të destabilizojë situatën në gjithë rajonin dhe të përshkallëzojë situatën në Kosovë. Ky vlerësim është bërë mbi bazën e informatave të vazhdueshme, që ne si institucione i marrim nga institucionet e sigurisë”, ka thënë ajo, duke aluduar te vizita e saj në SHBA dhe Letoni.

Osmani ka thënë se në fund të muajit maj, kanë marrë informacione të reja specifike lidhur me veprimet e Serbisë në kufi me Kosovën. Ajo ka thënë se është takuar me institucionet e sigurisë dhe se janë siguruar që çdo institucion të ketë mobilizimin e duhur për vendin. Osmani ka përmendur edhe njoftimin që u ka bërë aleatëve, duke kërkuar mbështetje nga ta.

“Gënjeshtrat e Serbisë se kinse ajo nuk merr hapa destabilizues është pjesë e propagandës së tyre të vazhdueshme, siç e dini deklarata të tilla kishte edhe pak para aktit të agresionit të shtatorit 2023, por edhe para çdo lloj akti agresioni”, ka thënë Osmani gjatë konferencës për media.

Osmani gjithashtu ka detajuar takimet që ka pasur në Shtetet e Bashkuara të Amerikës dhe në Republikën e Letonisë.

Ajo ka thënë se me administratën Trump kanë folur kryesisht për ekonominë e mbrojtjes, teksa ka potencuar angazhimin e Kosovës si eksportues i sigurisë, rritja e buxhetit të mbrojtjes dhe përkushtimin për anëtarësimin në NATO.

Osmani i ka bërë këto deklarata në një konferencë për media në Prishtinë, pas kthimit nga disa vizita në Shtetet e Bashkuara dhe Letoni.

Përgjatë vizitës në Uashington javën e kaluar, presidentja i ka konfirmuar deklaratat e presidentit amerikan, Donald Trump se ai e ka parandaluar një përshkallëzim të mundshëm nga Serbia në Kosovë “në javët e fundit”.

Vetë Trump i ka përmendur Kosovën dhe Serbinë në disa raste në javët e fundit, duke thënë se ka parandaluar një konflikt mes tyre, por pa ofruar hollësi për periudhën kohore.

Radio Evropa e Lirë e ka kontaktuar Shtëpinë e Bardhë për sqarim lidhur me këto deklarata, por nuk ka marrë përgjigje.

Përgjigje nuk ka nisur as Qeveria në detyrë e Kosovës, kur është pyetur se për çfarë lloj përshkallëzimi të situatës bëhet fjalë.

Misioni i NATO-s në Kosovë, KFOR, i ka thënë Radios Evropa e Lirë se Ballkani Perëndimor vazhdon të ketë rëndësi strategjike për aleancën dhe ajo është e përkushtuar për stabilitet rajonal.

Megjithatë, KFOR-i nuk ka dashur t’i komentojë deklaratat e fundit të Osmanit dhe Trumpit, duke thënë se për to duhet referuar te institucionet e Kosovës dhe ato të SHBA-së.

Edhe Ambasada e Gjermanisë në Kosovë i ka thënë një ditë më parë Radios Evropa e Lirë se nuk ka informacione për ndonjë përshkallëzim ushtarak të situatës mes Kosovës dhe Serbisë.