Presidenti i Ukrainës, Volodymyr Zelensky, ka shpallur një nga sukseset më të mëdha të Shërbimit të Sigurisë së Ukrainës (SBU) duke e cilësuar si një operacion historik që do të mbetet në kujtesën kolektive të kombit. Në një adresim drejtuar qytetarëve, Zelensky konfirmoi përfundimin me sukses të këtij operacioni të madh, të cilin e përshkroi si një prej më të rëndësishmëve në historinë moderne të shtetit ukrainas.

“Raporti i Shefit të Shërbimit të Sigurisë së Ukrainës, Vasily Malyuk, mbi operacionin tonë të sotëm. Rezultat absolutisht i shkëlqyer. Rezultati i pavarur i Ukrainës. Një vit, gjashtë muaj dhe nëntë ditë nga fillimi i planifikimit deri në zbatimin efektiv,” deklaroi Zelensky.

Ai bëri të ditur se bëhej fjalë për operacionin më të madh të transportit me kamionë që është ndërmarrë ndonjëherë nga Ukraina. Sipas Presidentit, operacioni u krye në territorin e Federatës Ruse, ndërsa ekipi ukrainas u largua në kohë dhe në mënyrë të sigurt.

“Njerëzit tanë që po përgatitnin operacionin u larguan në kohë nga territori rus. Falënderova Gjeneralin Malyuk për këtë sukses të Ukrainës. Udhëzova Shërbimin e Sigurisë së Ukrainës që të informojë shoqërinë rreth detajeve dhe rezultateve të operacionit që mund të publikohen,” tha ai.

Zelensky nënvizoi se, për arsye sigurie, shumë nga detajet nuk mund të bëhen ende publike, por theksoi rëndësinë e veprimit si një dëshmi e guximit, profesionalizmit dhe vendosmërisë së Ukrainës për të mbrojtur sovranitetin e saj.

“Sigurisht, jo gjithçka mund të thuhet tani, por këto janë veprime ukrainase që patjetër do të jenë në librat e historisë. Ukraina mbron veten dhe është mjaft e drejtë – ne bëjmë gjithçka që Rusia të ndiejë nevojën për t’i dhënë fund kësaj lufte. Rusia e filloi këtë luftë, Rusia duhet ta përfundojë atë. Lavdi Ukrainës!”, përfundoi Presidenti.

Ky operacion i klasifikuar si “i paprecedent” përmasash dhe impakti, përforcon imazhin e një Ukrainë që nuk është vetëm në mbrojtje, por edhe aktive dhe e aftë për të ndërmarrë aksione komplekse në thellësi të territorit armik. /Kosova.info/