Komuna e Prishtinës ka reaguar ndaj raportimeve të fundit në disa media, ku pretendohet se Kryeqyteti ka 80 milionë euro borxhe. Sipas komunës, këto pretendime janë të pasakta dhe krijojnë një perceptim të gabuar mbi situatën financiare të saj.

Në një deklaratë zyrtare, Komuna e Prishtinës thekson se shuma e përmendur përfshin detyrime kontingjente, të cilat nuk përbëjnë borxhe të konfirmuara, por janë çështje ligjore në proces. “Detyrimet kontingjente janë pretendime financiare që mund të shndërrohen në obligime vetëm nëse konfirmohen nga vendime gjyqësore përfundimtare,” thuhet në reagimin e komunës.

Sipas komunës, rreth 58 milionë euro nga këto detyrime janë fituar në shkallën e parë të gjykatës, ndërsa pjesa tjetër përfshin raste që janë ende në shqyrtim ose nuk kanë një vendim të formës së prerë.

Kontrata kolektive dhe ndikimi në financat e komunave

Komuna ka theksuar gjithashtu se një barrë e madhe financiare për të gjitha komunat në Kosovë është krijuar nga zbatimi i kontratës kolektive, e cila përfshin pagesa jubilare dhe shtesa për punonjësit publikë. Këto shpenzime, sipas komunës, nuk janë pasqyruar në buxhetet komunale nga niveli qendror.

“Kemi ngritur vazhdimisht këtë çështje përmes Asociacionit të Komunave të Kosovës, duke kërkuar një zgjidhje institucionale që të sigurojë stabilitetin financiar të komunave,” thuhet në deklaratë.

Angazhimi për menaxhim të qëndrueshëm financiar

Komuna e Prishtinës ka përsëritur përkushtimin e saj për një menaxhim të përgjegjshëm dhe transparent të financave publike, duke theksuar se po zbaton reforma në administrimin e të hyrave dhe optimizimin e shpenzimeve.

“Qytetarët duhet të informohen saktë për situatën financiare të komunës. Raportimet që paraqesin detyrimet kontingjente si borxhe të konfirmuara janë të pasakta dhe krijojnë një perceptim të gabuar,” përfundon reagimi i komunës. /Kosova.info/