Ish-rektori i Universitetit të Prishtinës, Enver Hasani, ka reaguar ashpër ndaj sjelljes së rektorit aktual, Arben Hajrullahu, gjatë mbledhjes së Senatit të UP-së më 21 shkurt 2025. Në një analizë të detajuar, Hasani e ka cilësuar sjelljen e Hajrullahut si të papranueshme dhe ka shprehur keqardhje për mbështetjen që i ka dhënë dikur hyrjes së tij në botën akademike.

Duke komentuar mbledhjen, Hasani ka theksuar se Hajrullahu ka treguar një arrogancë ekstreme, duke përdorur retorikë agresive dhe duke shkelur parimet e etikës akademike. Ai e ka quajtur sjelljen e tij një “akt të huliganizmit”, që tejkalon çdo normë të sjelljes akademike dhe institucionale.

“Arbeni veproi si një gjyqtar absolut, duke kërcënuar dhe imponuar vullnetin e tij pa respekt për normat dhe ligjet. Ai e përdori ligjin si mjet hakmarrjeje personale, duke dëmtuar integritetin e institucionit,” ka deklaruar Hasani, duke e krahasuar situatën me rastet e abuzimit me pushtetin të përshkruara nga filozofë si Stefan Cvajg dhe Léon Duguit.

Hasani gjithashtu ka shprehur zhgënjimin e tij për mungesën e reagimit nga senatorët e pranishëm, duke theksuar se Universiteti i Prishtinës nuk mund të funksionojë mbi bazën e frikës dhe autoritarizmit.

“Sjellja e tij është e papranueshme dhe cenon dinjitetin akademik. Universiteti nuk duhet të tolerojë më tej një qeverisje të tillë,” ka përfunduar Hasani duke bërë thirrje për ndërhyrje dhe masa për të mbrojtur integritetin e institucionit. /Kosova.info/