Kreshnik Gashi, gazetar hulumtues nga BIRN, ka ngritur shqetësime serioze në lidhje me arratisjen e Faton Hajrizit nga burgu i hapur i Smrekonicës, duke kritikuar mungesën e llogaridhënies nga institucionet përkatëse. Sipas Gashit, ende nuk është marrë asnjë masë konkrete për të mbajtur përgjegjës Shërbimin Korrektues të Kosovës (ShKK) për këtë incident.

Gashi ka theksuar se institucionet nuk kanë ndërmarrë hapa për të suspenduar apo larguar nga puna personat përgjegjës brenda ShKK-së, të cilët nuk e kanë kryer detyrën siç duhet.

Ai gjithashtu ka vënë në dukje mungesën e një hetimi të mirëfilltë profesional që do të zbulojë mënyrën e arratisjes dhe personat që mund të kenë ndihmuar Hajrizin.

Sipas Gashit, ekziston një hezitim për të zhvilluar një hetim penal të thelluar, ndërsa institucionet vazhdojnë të luajnë “ping pong” për të përcaktuar se kush duhet të hetojë dhe çfarë duhet të bëhet.

Ai ka bërë thirrje që Prokuroria të marrë masa dhe të kryejë një hetim të plotë mbi rastin, duke shtuar se ende nuk dihet kush ka nënshkruar dokumentet që çuan në vendosjen e Hajrizit në një burg të hapur, pavarësisht nga e kaluara e tij me arratisje të shpeshta dhe refuzimi i lirimit me kusht nga paneli përkatës.