Kryetari i bashkisë së Lviv-it, Andriy Sadovyi, tha se reagimi i Organizatës së Kombeve të Bashkuara për Arsimin, Shkencën dhe Kulturën ndaj sulmit vdekjeprurës rus të së enjtes në qytetin perëndimor të Ukrainës, nuk shkoi aq larg sa duhet, raporton CNN, transmeton Klan Kosova.

“Dje, UNESCO dënoi sulmet me raketa në qendrën historike të Lviv-it”, shkroi Sadovyi në një postim në Telegram të premten. “Ata nuk kanë guxuar as të përmendin emrin e vendit terrorist që po kryen këto sulme”, duke shtuar se “Rusia mbetet anëtare e komitetit ekzekutiv të organizatës”.

Të enjten, UNESCO lëshoi një deklaratë zyrtare në lidhje me goditjen e një ndërtese historike në Lviv, e cila ndodhet në zonën tampon të Ansamblit të Qendrës Historike të qytetit, një sit i Trashëgimisë Botërore. Ai tha se sulmi me raketa ishte një shkelje e Konventës së Trashëgimisë Botërore dhe Konventës së Hagës së vitit 1954 për Mbrojtjen e Pasurive Kulturore në rast të konfliktit të armatosur. Sulmi ishte i pari që ndodhi në një zonë të mbrojtur nga konventa që nga fillimi i pushtimit në shkallë të plotë, tha agjencia.

Megjithatë, deklarata nuk specifikon se kush qëndron pas sulmit.

Sadovyi tha se një përfaqësues i UNESCO-s duhet të kishte vizituar vendin e sulmit, ku janë vrarë të paktën 10 persona dhe janë plagosur 42 të tjerë.