Gjenerali amerikan, Mark Milley ka thënë se pushtimi i Ukrainës nga ana e Rusisë do të ishte “i tmerrshëm” dhe do të rezultonte me një numër të madh të viktimave.

Gjenerali Milley e ka përshkruar pozicionimin e gati 100,000 trupave ruse afër kufirit të Ukrainës, si hapin e tillë më të madh prej Luftës së Ftohtë.

Mirëpo Sekretari amerikan i Mbrojtjes, Lloyd Austin ka thënë se konflikti mund të shmanget ende përmes diplomacisë.

Rusia mohon se planifikon të pushtojë Ukrainën dhe se e sheh përkrahjen amerikane ndaj këtij shteti si kërcënim.

Në një konferencë për media në Pentagon, Gjenerali Milley – zyrtari më i lartë ushtarak i presidentit amerikan, Joe Biden – ka paralajmëruar se numri i forcave ruse afër kufirit me Ukrainën nënkupton se sulmi do të kishte pasoja të rënda.

“Nëse kjo gjë do të niste në Ukrainë, do të ishte e madhe, shumë e madhe dhe do të rezultonte me një numër të madh të viktimave”, ka thënë Milley.

“Jo e pashmangshme”

Sekretari amerikan i Mbrojtjes, Llody Austin, ka thënë se Shtetet e Bashkuara janë të përkushtuara për të ndihmuar Ukrainën që të mbrojë veten, duke përfshirë furnizimin me më shumë armë.

“Konflikti nuk është i pashmangshëm. Ka ende kohë dhe vend për diplomaci”, ka thënë Austin, duke i bërë thirrje presidentit rus, Vladimir Putin për ulje të tensioneve.

“Nuk ka arsye që kjo situatë të kalojë në konflikt… Ai mund të urdhërojë largimin e trupave”, ka shtuar ai.

Të premten, 28 janar, presidenti Biden ka thënë se do të dërgojë një numër të vogël të trupave ushtarake në Evropën Lindore në të “ardhmen e afërt” për të forcuar prezencën e NATO-s në rajon.

Ai nuk e ka specifikuar se ku saktësisht do të pozicionohen dhe kur do të arrijnë trupat.

Më herët gjatë javës, Pentagoni ka thënë se 8,500 trupa ushtarake janë të përgatitura për t’u nisur menjëherë pas dhënies të urdhrit.

Shtetet e Bashkuara kanë refuzuar një kërkesë kyçe të Moskës që NATO-ja të mos pranojë Ukrainën – mirëpo kanë insistuar se po i ofrojnë Rusisë “një rrugë diplomatike serioze”.

Presidenti rus, Vladimir Putin ka akuzuar Perëndimin se po injoron shqetësimet e Rusisë për çështje të sigurisë.

Mirëpo ai ka thënë se do të studiojë përgjigjen amerikane para se të vendosë se çfarë do të bëjë, është thënë në detajet e publikuara pas bisedës telefonike mes Putinit dhe homologut të tij francez, Emmanual Macron.

Franca ka thënë se të dy liderët janë pajtuar se ka nevojë për ulje të tensioneve dhe se presidenti Macron i ka thënë Putinit se Rusia duhet të respektojë sovranitetin e shteteve fqinje.

‘Mos krijoni panik’

Paralajmërimet nga Pentagoni kanë ardhur pasi presidenti ukrainas, Volodymyr Zelensky u ka thënë gazetarëve që të mos krijojnë panik rreth pozicionimit të trupave ruse në kufi.

Në një konferencë për media në Kiev, Zelenskyi ka thënë se nuk sheh kërcënim më të madh tani sesa gjatë një pozicionimi të ngjashëm të trupave ruse në pranverën e vitit të kaluar.

Krahasimi i fuqisë ushtarake të Ukrainës dhe të Rusisë

Një raport nga Global Firepower shfaq dallimet mes Ukrainës dhe Rusisë për nga fuqia ushtarake.

	Ushtria	Ukraina	Rusia
	Aeroplanë luftarakë	9898	1,5111,511
	Aeroplanë për misione speciale	55	132132
	Aeroplanë stërvitorë	7171	522522
	Aeroplanë transportues	3232	445445
	Artileri rimorkiuese	2,0402,040	7,5717,571
	Artileri vetëlëvizëse	1,0671,067	6,5746,574
	Autoblinda	12,30312,303	30,12230,122
	Buxheti i mbrojtjes	11.9 miliardë dollarë	154 miliardë dollarë
	Forca aktive	200,000200,000	850,000850,000
	Forca paraushtarake	50,00050,000	250,000250,000
	Forca rezerviste	250,000250,000	250,000250,000
	Helikopterë	146146	2,0872,087
	Madhësia e flotës	3838	605605
	Raketahedhës lëvizës	490490	3,3913,391
	Tanke	2,5962,596	12,42012,420

Shënim: Te helikopterët hyjnë të gjitha fluturaket e tilla, përfshirë helikopterët luftarakë.Tabela: Giovana Faria  Burimi: Global Firepower 2022

“Ka sinjale edhe nga liderë të respektuar të shteteve, ata thonë se nesër do të ketë luftë. Ky është panik – sa shumë i kushton shtetit tonë?”

“Destabilizimi i situatës brenda shtetit” përbën kërcënimin më të madh për Ukrainën, ka thënë ai.

Në kërkesat e Moskës ndaj Perëndimit përfshihen edhe ato që:

• Ukraina të mos pranohet në NATO
• NATO-ja t’i japë fund aktivitetit ushtarak në Evropën Lindore dhe të tërheqë trupat nga Polonia dhe republikat baltike, Estonia, Letonia dhe Lituania
• Aleanca veriatlantike të mos pozicionojë raketa në shtetet afër apo në kufi me Rusinë

Shtetet e Bashkuara dhe NATO-ja janë përgjigjur duke thënë se Ukraina ka të drejtë të zgjedhë aleatët e vet, mirëpo i kanë ofruar Rusisë mundësinë e negocimit rreth raketave dhe çështjeve tjera.

Nëse Rusia pushton Ukrainën, kjo nuk do të ishte hera e parë.

Rusia ka aneksuar Gadishullin ukrainas të Krimesë më 2014.

Ky vend po ashtu mbështet rebelët në konfliktet në rajonet lindore të Ukrainës, në të cilat kanë vdekur rreth 14,000 persona.