Presidenti i Ukrainës, Volodymyr Zelensky, ka deklaruar se Rusia po i ofron Iranit inteligjencë dhe imazhe satelitore të objektivave për sulm gjatë fushatës ushtarake SHBA-Izrael kundër Teheranit.

Në një intervistë për Channel 12, Zelensky tha se Rusia po e ndan këtë informacion me regjimin iranian që nga fillimi i luftës, pasi ka interes që lufta të zgjasë sa më shumë.

Ai konfirmoi se ka pasur shumë pak kontakte me kryeministrin izraelit Benjamin Netanyahu gjatë dy viteve të fundit, duke vlerësuar se ai po përpiqet të balancojë marrëdhëniet me Moskën dhe Kievin, “edhe pse Rusia po e ndihmon Iranin.”

Zelensky dhe Netanyahu janë takuar për herë të fundit në margjinat e Asamblesë së Përgjithshme të OKB-së në tetor 2023, ndërsa që atëherë kanë folur rrallë në telefon. Presidenti ukrainas shprehu interes për zgjerimin e dialogut.

I pyetur për mesazhin e tij ndaj Netanyahut, Zelensky u shpreh: “Ne kemi atë që i duhet atij, ai ka atë që na duhet neve… Ne jemi të gatshëm për këtë dialog,” duke iu referuar ndihmës së ndërsjellë ushtarake.

Së fundmi, Zelensky ka dërguar personel ushtarak në Jordani, Arabinë Saudite dhe Emiratet e Bashkuara Arabe për të ndihmuar në neutralizimin e dronëve iranianë, duke u bazuar në përvojën ukrainase, por Izraeli nuk ka kërkuar ndihmë nga Ukraina.

Në prag të Pashkës hebraike, Zelensky u uroi hebrenjve në mbarë botën “paqe”, duke theksuar se paqja është gjëja që mungon më së shumti në botë.