Kryeministri kanadez Justin Trudeau i ka quajtur tarifat e Donald Trump ndaj vendit të tij, si dhe ndaj Kinës e Meksikës, “shumë të paafta.”

“Ne nuk do të tërhiqemi nga kjo luftë,” tha Trudeau, pas shpalljes së tarifave kundërpërgjigjëse prej 25% për miliarda dollarë produkte amerikane.

Kryeministri Trudeau thotë se Kanadaja ka në plan të sfidojë “veprimet e paligjshme” të SHBA-së duke dorëzuar kërkesa për zgjidhjen e mosmarrëveshjeve për tarifat e SHBA-së në Organizatën Botërore të Tregtisë, duke theksuar se ato përbëjnë një shkelje të marrëveshjes së tregtisë së lirë mes Kanadasë dhe SHBA-së.

“Kanadaja do të mbajë tarifat e saj mbi produktet amerikane deri sa SHBA të heqë të tijat”, shtoi Trudeau, duke thënë se Kanadaja po shqyrton mundësi të tjera për t’iu përgjigjur, përveç tarifave kundërpërgjigjëse, nëse Trump nuk ndalon.

Trudeau vazhdoi fjalimin e tij duke thënë se SHBA ka zgjedhur të nisë një luftë tregtare “e cila para së gjithash do të dëmtojë familjet amerikane”. “Ata kanë zgjedhur të sabotojnë axhendën e tyre,” shton Trudeau. “Nuk ka absolutisht asnjë justifikim apo nevojë për këto tarifa sot”, tha ai.

Ai vazhdoi duke i përshkruar tarifat si një “gjë memece për t’u bërë”.

Kryeministri kanadez ka thënë se ajo minon marrëveshjen që ai dhe Presidenti Trump bënë për të trajtuar çështjen e prodhimit të fentanilit dhe përshkruan hapat që vendi i tij ka ndërmarrë kundër tij. Ai ka këmbëngulur se pretendimi i Trump se Kanadaja nuk është e gatshme të luftojë drogën është “krejtësisht i rremë”.

Presidenti i SHBA-së paralajmëroi se administrata e tij do të rrisë tarifat ndaj Kanadasë “me një shumë të ngjashme.”

Më herët, tregjet e aksioneve në SHBA dhe Evropë ranë pasi filluan tarifat 25% për importet nga Kanadaja dhe Meksika, si dhe një taksë e re prej 10% kundër Kinës.

Pekini premtoi të luftojë SHBA-në “deri në fund,” duke shpallur tarifa deri në 15% për një gamë produktesh amerikane, ndërsa Meksika tha se do të paraqesë masa kundërpërgjigjëse të dielën.

Analistët paralajmërojnë se tarifat mund të rrisin çmimet për familjet amerikane dhe të kenë një efekt të tërthortë për konsumatorët në mbarë botën, shkruan BBC.