Përzgjedhësi i Ganës, Carlos Queiroz, ka kritikuar ashpër sistemin VAR pas barazimit 0:0 me Anglinë në ndeshjen e Grupit L të Kupës së Botës 2026.

Pas përfundimit të takimit të zhvilluar në stadiumin “Gillette”, trajneri portugez është paraqitur i irrituar në konferencën për media, duke pretenduar se skuadra e tij është privuar nga një penallti e pastër dhe një karton i kuq për mbrojtësin anglez Ezri Konsa.

“VAR-i ishte në pushim. A po funksionon ende VAR-i në këtë Botëror? Kam dyshime për këtë”, ka deklaruar Queiroz me ironi.

Momenti i parë i diskutueshëm ka ndodhur në minutën e gjashtëdhjetë e gjashtë, kur sulmuesi Prince Kwabena Adu është përplasur me portierin anglez Jordan Pickford pas një depërtimi të rrezikshëm. Gjyqtari nga Hondurasi, Said Martinez, ka akorduar faull në favor të Anglisë dhe nuk ka pasur rishikim nga VAR-i.

Sipas Queirozit, Pickford duhej të ndëshkohej me karton të kuq për ndërhyrjen.

Rasti i dytë ka ndodhur në minutën e shtatëdhjetë e nëntë, kur Ezri Konsa ka ndërhyrë ndaj Adu pranë zonës së rreptësisë. Bankina e Ganës ka kërkuar menjëherë penallti, por gjyqtari ka lejuar vazhdimin e lojës dhe VAR nuk ka ndërhyrë.

Edhe ish-sulmuesi i Anglisë, Wayne Rooney, i cili po komentonte ndeshjen për televizion, ka vlerësuar se Konsa kishte marrë një rrezik të madh dhe kishte goditur lojtarin, e jo topin.

Megjithatë, Queiroz është përpjekur ta shprehte pakënaqësinë me humor, duke pasur parasysh rregullat e FIFA-s për kritikat ndaj gjyqtarëve.

“Më falni për sarkazmën, por nëse i them këto gjëra seriozisht, atëherë mund të ndëshkohem”, ka thënë ai.

Pavarësisht ankesave për arbitrimin, trajneri i Ganës është shprehur i kënaqur me rezultatin. Ai e ka pranuar se Anglia kishte më shumë posedim të topit, por ka theksuar se skuadra e tij ka krijuar raste të mira dhe mund ta kishte fituar ndeshjen.

“Anglezët janë me fat. Ata e mbajtën më shumë topin, por ne luftuam më shumë dhe krijuam mundësitë tona. Në fund, jam i kënaqur me barazimin”, ka deklaruar Queiroz.

Pas dy ndeshjeve, Gana dhe Anglia kryesojnë Grupin L me nga katër pikë, ndërsa Kroacia ka tri pikë. Panama tashmë është eliminuar.

Gana do të sigurojë kualifikimin në fazën eliminatore për herë të parë që nga viti 2010 nëse arrin të marrë të paktën një barazim ndaj Kroacisë në ndeshjen e fundit të grupit, e cila zhvillohet të shtunën në Philadelphia.