Tema e festivalit DokuFest për edicionin e 21-të është quajtur “How to Survive…?” (në shqip: Si të Mbijetosh?), e cila përqendrohet rreth nocionit të mbijetesës dhe që për herë të parë vjen në formën e një pyetjeje.

“Si t’i mbijetosh nxehtësisë, përmbytjeve, dhunës, inflacionit, luftërave, fashizmit dhe përfundimisht zhdukjes… Janë vetëm disa nga pyetjet që do të shtrohen”, thuhet në njoftimin e Dokufest.

Dokufest tha se nëpërmjet bisedave dhe debateve të shumta me të ftuar, mendimtarë dhe ekspertë, festivali do të përpiqet të kërkojë përgjigje për këto pyetje ekzistenciale, “në një kohë ku mbijetesa në një botë të trazuar është bërë e domosdoshme për të gjithë ne”.

“Një planet që po ndryshon në mënyra të thella, të tmerrshme dhe të dukshme tani dhe nëse nuk ndërmerret asnjë veprim, së shpejti do të jetë një planet në vdekje”, thuhet tutje në përshkrimin e temës.

“Një numër filmash nga programi prekin temën e të mbijetuarit në mënyrë të drejtpërdrejtë ose të tërthortë dhe ne jemi të emocionuar të gjejmë mënyra për të ftuar audiencën tonë që të bisedojmë rreth kësaj teme”.

Edicioni i sivjetmë i festivalit do të mbahet nga 5 deri më 13 gusht, në Prizren.