Organizata për Rritjen e Cilësisë në Arsim (ORCA) do të organizojë një aksion protestues kundër Këshillit të Etikës, ky aksion do të zhvillohet rreth orës 11:00

Aksioni protestues i cili do të zhvillohet para rektoratit të Universitetit të Prishtinës, ka të bëjë me vendimet e fundit të ndërmarra ndaj profesorit Xhevat Krasniqi, i cili po akuzohet nga 27 studente për ngacmim seksual.

Këshilli i Etikës para pak ditësh ka rekomanduar suspendimin e tij.

Pas kësaj, rektori i UP-së mori vendim për pezullimin nga puna të profesorit Xhevat Krasniqi me efekt të menjëhershëm, sipas kornizës normative përkatëse, derisa të përfundojnë veprimet hetuese nga ana e prokurorisë se shtetit.

“Mbi bazën e vendimit të Këshillit të Etikës dhe rekomandimit drejtuar Rektoratit, Rektori i UP-së mori vendim për pezullimin nga puna të Prof. Xh.K., me efekt të menjëhershëm, sipas kornizës normative përkatëse, derisa të përfundojnë veprimet hetuese nga ana e prokurorisë se shtetit”, thuhet në njoftimin e UP-së.

Ndërkaq, pas pezullimit, Prokuroria Themelore në Prishtinë ka njoftuar se ka filluar procedurat hetimore ndaj profesorit të Universitetit të Prishtinës, Xhevat Krasniqi për “ngacmim seksual”.

“Prokuroria Themelore në Prishtinë, sipas detyrës zyrtare ka iniciuar rast në drejtim të veprës penale ‘ngacmimi seksual’, sipas Kodit Penal të Republikës së Kosovës. Prokuroria ka autorizuar policinë në ndërmarrjen e veprimeve hetimore, për të grumbulluar provat dhe informatat që lidhen me këtë çështje. Aktualisht, janë duke u marrë deklarata të personave të përfshirë në këtë rast, si dhe po kryhen veprime të tjera hetimore, konform dispozitave të KPPRK-së.”

Profesor Xhevat Krasniqi, i cili është mësimdhënës në Fakultetin e Edukimit, është denoncuar nga 27 studente për sjellje të papërshtatshme dhe ngacmim seksual.

Akuzat e studenteve fillimisht u paraqitën në Këshillin e Etikës të Fakultetit të Mjekësisë, i cili vendosi të ndërpresë bashkëpunimin me Krasniqin, por masa të mëtejshme do të varen nga rezultatet e hetimit të prokurorisë.