Mijëra ish-luftëtarë të organizatës terroriste Shteti Islamik (ISIS) dhe familjarë të tyre dyshohet se janë arratisur nga kampi Al-Hol në veri të Sirisë, duke ngritur shqetësime për sigurinë ndërkombëtare.

Autoritetet siriane kanë bërë të ditur se ende po verifikojnë numrin dhe identitetin e personave të arratisur, që vlerësohet të jetë mes 15 mijë dhe 20 mijë individë, përfshirë mijëra luftëtarë të dyshuar. Sipas tyre, vendndodhja e tyre aktuale mbetet e panjohur.

Arratisjet dyshohet se kanë ndodhur gjatë një periudhe disa javore në muajin janar, kur forcat kurde, të cilat më parë menaxhonin kampin, u tërhoqën dhe përgjegjësia e sigurisë iu kalua autoriteteve qeveritare siriane, duke krijuar vakum sigurie që mundësoi largimin e të ndaluarve.

Agjencitë e inteligjencës kanë paralajmëruar se një pjesë e të arratisurve mund të përpiqen të hyjnë në territorin e Bashkimi Evropian, shpesh duke u fshehur mes grupeve të migrantëve që lëvizin nga Afrika e Veriut drejt Evropës.

Analistët e sigurisë theksojnë se, edhe pse ka humbur kontrollin territorial, ISIS vazhdon të paraqesë rrezik global. Gjatë vitit të kaluar, mbetjet e grupit militant kanë kryer sulme të vogla në Siri dhe vende të tjera, duke tentuar riorganizim dhe rekrutim të militantëve të rinj nga pjesë të ndryshme të botës.