Lionel Messi është sëmurë vetëm një ditë pasi e fitoi Topin e Artë për herë të shtatë në karrierë.

Të hënën mbrëma, sulmuesi i Paris Saint-Germainit ishte njeriu kryesor në ceremoninë e France Football në Theatre du Chatelet të Parisit, ku e mori trofeun më të rëndësishëm.

34-vjeçari la prapa të gjithë konkurrentët, në fund edhe sulmuesin e Bayern Munichut, Robert Lewandowski, për ta fituar çmimin prestigjioz individual.

Mirëpo, ai është duke vuajtur nga simptomat e një gastroenteriti, një inflamacion i shpeshtë i lukthit dhe zorrëve.

Gastroenteriti është një gjendje shumë e shpeshtë që shkakton barkqitje dhe vjellje. Zakonisht shkaktohet nga infeksioni bakterial ose virusal. Gastroenteriti mund të jetë shumë i pakëndshëm, por zakonisht kalon vetë brenda javës dhe i sëmuri mund të kujdeset vet në shtëpi.

Te fëmijët më së shpeshti shkaktohet nga virusi i quajtur rotavirus, derisa te të rriturit e shkakton norovirusi (i njohur si infeksioni dimëror që shkakton vjellje) ose infeksioni bakterial ushqimor.

PSG e ka konfirmuar lajmin të martën që do të thotë se Messi është në dyshim për ndeshjen e Ligue 1 kundër Nice që zhvillohet të mërkurën mbrëma në Parc des Princes.

“Lionel Messi dhe Leandro Paredes nuk kanë marrë pjesë në stërvitjet e sotme për shkak të simptomave të gastroenteritit. Mëngjesin e nesërm do të bëhen kontrolle shtesë”, thuhet në njoftimin e klubit francez.