Sot, në Prishtinë-Superliga e meshkujve dhe në Ferizaj Superliga e femrave, janë zhvilluar dy xhirot e para të Kampionatit ekipor. Në Prishtinë u zhvilluan ndeshje me rivalitet të lartë qysh nga xhiro e parë. Përforcimi i disa klubeve me lojtarë nga jashtë ka bërë që të nivelizohet cilësia e ekipeve dhe të shtohet rivaliteti, duke e bërë që gati secila ndeshje të ketë epitetin e derbit.

Në xhiron e parë, megjithëse rezultatet janë bindëse për ekipet fituese, megjithatë shumica prej tyre kaluan në shenjë të ndeshjeve të forta individuale. Në ndeshjen më interesante KPP Liria e mundi skuadrën me përvojë dhe me kampionë të dikurshëm Paysera Dardania me rezultatin 4:0. Me rezultat të njëjtë fituan edhe KPP Lidhja e Prizrenit ndaj KPP Shkolla Prizreni, ndërkaq KPP Priping KPP Gani Maloku 4:1. Ndeshja KPP Ahmet Hoxha Prishtina u regjistrua me rezultat zyrtar 4:0, pasi skuadra ferizajase nuk udhëtoi në Prishtinë.

 Në xhiron e dytë, ndeshja më interesante u luajt ndërmjet Prishtinës dhe Lirisë nga Prizreni. Pas një dueli tejet të ngushtë dhe shumë të fortë, Prishtina ia doli të fitonte me 4:2 në seta. Dueli më atraktiv u luajt ndërmjet grekut (Jorgos Kosmas) të Lirisë dhe turkut Batuhan Kuzmin të Prishtinës, ku në fund në saje të cilësisë dhe përvojës fitoi lojtari i Prishtinës. Lidhja e Prizrenit dhe Pripingu, dy të parat nga Kampionati i kaluar, mundën kundërshtarët me 4:2 në sete Gani Malokun, përkatësisht Shkolla Prizrenin me 4:0 dhe që nga fillimi paralajmëruarn se do të jenë rivalë për titullin e kampionit. Ndeshja Paysera Dardania Ahmet Hoxha do të luhet gjatë javës së ardhshme.

Në Superligën e Femrave, Drita dhe Prishtina, së bashku me Ahmet Hoxhën, fituan bindshëm ndaj rivaleve tjera dhe qysh nga fillimi u vendosën në kreun e renditjes. Fitoren e parë e arriti edhe Vushtrria në ndeshjen ndaj Shpresës me rezultatin 4:1. Ndeshja ndërmjet Ahmet Hoxha MK dhe Shpresa do të luhet gjatë javës së ardhshme.

Fundjavën e ardhshme (21/04/) do të luhen dy xhirot e para të Ligës së Parë për Meshkuj dhe Femra, si dhe Ligës së Dytë (Meshkuj) për Grupet A, B dhe C.

Kurse, të martën me 23 Prill do të shënohet Dita botërore e Pingpongut. /Kosova.info/