Joe Biden ka zbarkuar në Tel Aviv të Izraelit në vizitën e tij të parë në Lindjen e Mesme si president i Shteteve të Bashkuara.

Sipas mediave të huaja, me të mbërritur në aeroportin Ben Gurion të mërkurën, Biden u përshëndet ngrohtësisht nga zyrtarët izraelitë dhe, në një fjalim, e përshkroi lidhjen e SHBA me vendin si “të thellë”.

“… Lidhja mes popullit izraelit dhe amerikan është e thellë… Jam krenar të them se marrëdhëniet e SHBA me Izraelin janë më të thella dhe më të forta se sa kanë qenë ndonjëherë”.

Udhëheqësi amerikan përsëriti gjithashtu mbështetjen e tij për një zgjidhje me dy shtete të konfliktit izraelito-palestinez.

Ndërsa në një fjalim, kryeministri izraelit Yair Lapid e përshkroi Biden si një “sionist të madh”.

“Marrëdhënia juaj me Izraelin ka qenë gjithmonë personale”, tha Lapid, duke e quajtur Biden “një nga miqtë më të mirë që Izraeli ka njohur ndonjëherë”.

Kjo është vizita e dhjetë e Bidenit në këtë vend. E para e tij ishte në vitin 1973, kur ai ishte një senator i mandatit të parë amerikan nga Delaware.

Siç vë në pah Al Jazeera, përcjell Telegrafi, Biden do të kalojë dy ditë në Jerusalem në bisedime me udhëheqësit izraelitë, duke përfshirë Lapid dhe ish-kryeministrin Benjamin Netanyahu, përpara se të takohet me Presidentin e Autoritetit Palestinez (PA) Mahmoud Abbas të premten në Bregun Perëndimor të pushtuar.

Ai më pas do të marrë një fluturim të drejtpërdrejtë të paprecedentë nga Izraeli në Jeddah, Arabi Saudite – pasi mbretëria nuk e njeh ekzistencën e Izraelit – për bisedime me zyrtarët sauditë dhe për të marrë pjesë në një samit të aleatëve të Gjirit.

Izraeli, i cili është zhytur në ngërç politik përpara zgjedhjeve të 1 nëntorit, thotë se po ngre 1000 flamuj në të gjithë Jerusalemin për të mirëpritur liderin amerikan, i cili nuk e ka anuluar vendimin e diskutueshëm të ish-presidentit Donald Trump për të njohur qytetin si kryeqytet të Izraelit.

Palestinezët e shohin Jerusalemin Lindor të pushtuar si kryeqytetin e tyre dhe, përpara vizitës, kanë akuzuar Bidenin se nuk ka përmbushur premtimin e tij për të rivendosur SHBA-në si një ndërmjetës të ndershëm në konflikt.

“Ne dëgjojmë vetëm fjalë boshe dhe asnjë rezultat”, ka thënë Jibril Rajoub, një figurë e lartë në lëvizjen Fatah të Abbasit.

Biden do të takohet me Abbasin në qytetin e Betlehemit të Bregut Perëndimor të premten, por nuk ka pritje “të njoftimeve të guximshme” drejt negociatave të reja mbi shtetësinë palestineze, që do të thotë se vizita thjesht mund të thellojë zhgënjimin palestinez.